Crida de Marcha! – Platafòrma de la Societat Civila Occitana [OC]

Una manca gròssa de transparéncia

Mentre que totei si questionavam sus l’avenir de la mobilizacion dau movement occitan en favor de la lenga, fugueriam fòrça susprès au mes de fevrièr passat de recebre una crida per manifestar lo 24 d’octobre venent a Montpelhier, sensa jamai aguer sachut que se ne’n discutiá. Coma fuguèt presa aquela decision ? Per cu ? Quora ? Dins aquel afar la manca de transparéncia es totala.

Va sabem que per desacòrdi, la FELCO e lo Felibrige, an decidit de laissar la coordinacion “Anem Òc” e doncas de prononçar sa dissolucion. Aquò empachèt pas lo nòu collectiu de reprendre l’eslogan “Anem Òc” dins lo concors d’afichas qu’organisèt. Coma aquò enfortís lo fosc dins lo quau si trobam, amai bastís sa comunicacion sus una messòrga. Per ara, solament doas estructuras son organisatoras de la manifestacion de Montpelhier, la federacion Calandreta e l’I.E.O. Nacionau. Se sembla qu’aqueu darrier prenguèt pas la pena de consultar sei sòcis per que s’expriman sus la question, nimai ne consultèt sei seccions regionalas e localas, e bèu promièr la seccion Lengadòc qu’es la mai pertocada. Aquò es sa causida e son drech, mai siam forçats de constatar que la data, lo lòc e la natura de la manifestacion fugèron pensadas e actadas dins leis autas esfèras de l’occitanisme, qu’ara son sovent ben soletas e aluenchadas de la realitat dau terren.

Lengadòc, encara e totjorn

Tre 2007, annada de la dosena manifestacion occitana a Besièrs, çai e lai si demandava ais organisators una acampada en defòra dau país lengadocian. Aquela crida fuguèt lançada dempuei Gasconha, Provença, Lemosin, mai tanben fuguèt sostenguda per d’estructuras basadas en Lengadòc. Totjorn nos respondèron que, per de rasons praticas, èra pas possibla d’envisajar una manifestacion unitària au delà de l’axe Tolosa-Montpelhier. De qu’es nòstra credibilitat, en tant qu’occitans, se siam pas capables de nos acampar en defòra de la region centrala d’Occitània ? Coma se pòu combatre lo sistèma centralista francés mentre que totjorn lo reprodusim a nòstra escala ?

Nombrós son lei territòris occitans abandonats, devastats per la manca de reconeissènça institucionala e la pauretat de l’ofèrta d’ensenhament de l’occitan, mai leis organisators de la manifestacion son testards e maugrat un molon de demandas, concentran son accion dins Lengadòc solament. Perque causir Montpelhier, una vila onte l’occitan si pòrta fòrça ben per çò qu’es de sa representacion sociala ? D’autrei regions coma Lemosin, Provença, an mestier d’aquela reconeissènça a l’entorn de l’occitan. De comunas coma Marselha, Lemòtges emai Bordèu an un malhum d’estructuras en capacitat de cò-assumir la tenguda d’un acampada comuna e coma aquò profiechar dei retombadas mediaticas e politicas. De çò que ne’n sabem, jamai fuguèt envisatjada aquela opcion. Malurosament, en fonccionant d’aqueu biais, fasèm la part bèla ai detractors de l’occitan que per elei nòstre movement se resuma a una egemonia lengadociana. Tanben enfortissam la desconneissènça generala que vòu qu’Occitània es Lengadòc e basta.

Ni revendicacion concrèta, ni bilanç

Lo paperòt oficiau de la “coordinacion per la lenga occitana” qu’apèla a manifestar amolona leis estatisticas negativas sus l’occitan (que d’unei se pòdon discutar), sensa jamai exprimir de demandas concrètas. La situacion de l’occitan es catastrofica, totei siam d’acòrdi amb’aquò, mai aqueu constat simplàs basta pas, lo fach de l’enonciar clarament jamai permetrà d’enraiar la maquina. Per far un constat credible, per ne’n far un argument de pes, avem pas la causida : nos fau èstre capables de fargar de proposicions concrètas per inversar la tendéncia. Si nautrei, militants, sabem pas per qué nos batem e manifestam, coma lo podrián saupre leis esfèras politicas dei decidaires, qu’elei son pas tant engatjadas per l’occitan ò que de còp que l’a, se’n fotan completament ? Lei questions de fons pausadas per la situacion de l’occitan uei dèvon menar a de respònsas ben bastidas, aquò avans la tenguda de la manifestacion. Perque siam apelats a manifestar lo 24 d’octobre ? Que demandam ai poders publics ? Que son nòstreis exigéncias ? Per quala temporada ?

Tanben si fau constatar la manca d’estrategia a tèrmi lòng. Après Carcassona en 2005, aquò farà donc 5 còps en 10 ans que s’acampan totei lei tendéncias de l’occitanisme per exigir mai de reconeissènça de la part dei poders publics. Que fuguèron lei consequéncias dei manifestacions passadas ? Qualas avançadas fugèron obtengudas ? Se l’actuala coordinacion es pas capable de respòndre positivament a n’aquelei questions, coma pòu argumentar en favor d’una novèla manifestacion, dins aqueu contèxte de desalenament e de remesa en causa generalisada, coma ditz dins lo comunicat ? Siam onèstes : lei manifestacions occitanas cambièron rèn ò quasi. Lei mèdias nacionaus nos ignoran e lei quauquei responsables governamentaus que denhèron prendre posicion nos an gavat de paraulas non tengudas. Sieguem segur que per leis eleccions regionalas venentas, se trobarà de responsables politics divèrs en campanha dins de movements ciutadans, venguts sonhar son imatge sensa jamai rèn far per l’occitan pendent son futur mandat. Probable qu’ara fau envisatjar d’autrei biais de manifestar, en laissant de costat lei consideracions politicianas, lei desiderata egoïstas e autrei tira-cubertas. Es ora d’abandonar la corsa descabestrada ai subvencions, que totei siam en concuréncia leis uns e leis autrei mentre qu’obram per lei meteis objectius. Retrobam aquelei objectius comuns.

Una necessitat de democratisar lo movement

Es pas de gaietat de còr que publicam uei nòstre desacòrdi sus lo biais d’organisar lo movement occitan dich « oficiau ». Per èstre aunèste, aquela crida que lançam fuguèt tanben motivada per lo fach que cada còp que portavam criticas sus l’iniciativa d’ “Anem Òc”, fuguèram considerats coma d’empechaires de virar en redon, de gènts incapables d’organisar qué que siegue per l’occitan. Aisada es la critica, bensai, mai tanben es un dei fondaments d’una democracia e en refusant de s’i sometre, la coordinacion actuala solinha lei disfonccionaments que pauc a cha pauc la rosigan. Pièger, cava sa pròpria tomba emai alarga lo fossat que la separa d’una granda partida de la jova generacion d’occitanistas. En refusant d’ausir leis arguments mai d’un còp enonciats que reprenem aqui un còp mai, pièger, en leis escobant sensa jamai assajar de portar de respònsas e en infantilisant tot movement contestatari, aquela coordinacion se decredibilisa, se delegitimisa e condamna, per avança, lo succès potenciau de sa pròpria manifestacion !

Avem pas la pretencion de representar mai que d’autrei lo movement occitan ò ben leis occitanistas, mai nòstra vòtz còmpta tanben e dèu èstre ausida. Siam pas, coma d’unei va dison, de divisaires. Volem un movement occitan que fai avans, per una representativitat mai justa que naturalament menarà a una presa de posicion comuna mai fòrta e mai clara. Per aquò far, es essenciau de remetre en question lei praticas de consultacion e de decision dei subjèctes que pertòcan l’ensèmble dei militants engatjats per lo desvolopament de la cultura nòstra. Ja un promièr pas fuguèt fach en Provença ambé la creacion dau Forum d’òc, que pausa lei basas d’una granda acampada deis associacions occitanas e que permet d’engatjar una reflexion comuna. Fau enfortir e generalisar aquel otís perque toteis avem la meteissa tòca.

Devèrs la presa en còmpte d’una societat civila occitana

Aqueu charivari a l’entorn de la manifestacion de Montpelhier dèu permetre una reflexion mai importanta. Nos agradariá que lei decidaires actuaus laissèsson de costat aqueu ròtle, que son nombre se redusís a cada eveniment e que uei siam dins una situacion incredibla que fai que doas direccions d’associacions, e solament doas, incitan tota una populacion a aparar sei pròpris interèsts. Refusam d’èstre utilisats ò instrumentalisats per una minoritat d’organismes qu’assajan de sauvar çò que pòu èstre sauvat per d’eleccions regionalas que van, per causa de refòrma, tornar despartir lei cartas e modificar lo paisatge associatiu, que siegue occitan ò non. Tot aquò marcarà per longtemps cada ciutadan que rèsta sus lo territòri. Tanben desiram que la question dau retalhatge regionau siegue pausada sus la taula sensa esitar, que basta d’èstre d’estrucis alienadas e somesas au gavatge dei subvencions publicas sensa si rendre còmpte que lèu la fònt sarà agotada.

Empacharam pas aquela manifestacion, auriá ges de sens. En i participant sariam, nos sembla, instrumentalisats per d’objectius mai que foscs. En anent pas manifestar, saram oficialament considerats coma d’anti-occitans primaris (aquela empega !) que critican de lònga e que prepausan guaire. Anètz manifestar ! Bensai que nautrei tanben manifestaram… Alhors, d’un autre biais. A Bordèu, Marselha, Lemòtges, Pau, Clarmont, emai París, perque pas, pertot onte l’a mestier, onte l’a un interest vertadier, un interest generau. Vos en faguètz pas. Aquí son solament de pensaments que desvoloparam ambé d’autrei, ambé totei, au còr d’una platafòrma vertadierament democratica qu’es pas dependenta d’associacions vielhassas tancadas dins sei certituds e sei marridas costumas. Volem una platafòrma representativa de la societat civila occitana, qu’au dintre cada vòtz còmpta e pòu èstre ausida, emai lei vòtz d’aquelei que uei se reconeisson pas mai dins lei partits politics nimai dins leis associacions tradicionalas.

Cambian lei causas, e amb’elei cambiarem.

Publicités

2 réflexions sur “Crida de Marcha! – Platafòrma de la Societat Civila Occitana [OC]

  1. Pingback: « Es pas signat  – Refleccion sus la valor de l’anonimat | «Marcha!

  2. Vertat avèm besen de transparença ! e cresi que i a punt força important cal pas tostèm ciblar la lenga e re que la lenga mas la CULTURA ( la lenga es dins lo contingut) força monda se reconeish dins la cultura occitana mas pas simplament la lenga !!

    J'aime

Participar

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l'aide de votre compte WordPress.com. Déconnexion /  Changer )

Photo Google+

Vous commentez à l'aide de votre compte Google+. Déconnexion /  Changer )

Image Twitter

Vous commentez à l'aide de votre compte Twitter. Déconnexion /  Changer )

Photo Facebook

Vous commentez à l'aide de votre compte Facebook. Déconnexion /  Changer )

Connexion à %s